(ប៊ែឡាំង)៖ លោក Herbert Hainer នាយកប្រតិបត្តិក្រុមហ៊ុនផលិតសម្ភារៈកីឡាដ៏ធំនៅលើពិភពលោក Adidas បាន ស្នើសុំឲ្យមានការកំណត់អាយុ ក៏ដូចជាអាណត្តិក្នុងការធ្វើជាប្រធានសហព័ន្ធបាល់ទាត់ពិភពលោក FIFA សម្រាប់លើកក្រោយៗទៀត។
ក្នុងកិច្ចសម្ភាសន៍មួយជាមួយនឹងទស្សនាវដ្តី WirtschaftsWoche ដែលត្រូវបានដកស្រង់ដោយសារព័ត៌មាន Channel News Asia នៅព្រឹកថ្ងៃទី១៩ វិច្ឆិកានេះ លោក Hainer បានលើកឡើងថា «ការកំណត់អាយុ និងអាណត្តិក្នុងការដឹកនាំ FIFA វាគួរតែត្រូវបានធ្វើឡើងក្នុងលក្ខខណ្ឌសមស្របណាមួយ ហើយក៏ស្ថិតក្រោមការឃ្លាំមើលពីក្រុមប្រឹក្សាវិន័យ និងដៃគូឧបត្ថម្ភធំៗផងដែរ»។
បុរសជនជាតិអាល្លឺម៉ង់រូបនេះបានសង្កត់ធ្ងន់ថា ការធ្វើបែបនេះចៀសវាងកើតឡើងនូវអំពើពុករលួយ ហើយក៏ជាគម្រោងការទី១ ក្នុងការលុបបំបាត់រឿងអាស្រូវទាំងឡាយណា ដែលកើតឡើងក្នុងស្ថាប័នដែលមិនគិតប្រាក់កំរៃនេះទៀតផង។ FIFA នឹងធ្វើការបោះឆ្នោតជ្រើសរើសប្រធានថ្មីជំនួសតំណែងលោក Sepp Blatter នាថ្ងៃទី២៦ ខែកុម្ភះ ឆ្នាំ២០១៦ ខាងមុខ ក្នុងនោះដែរមានបេក្ខជន៥រូបត្រៀមឈរឈ្មោះ។
សូមបញ្ជាក់ថា Adidas ជាក្រុមហ៊ុនយក្សរបស់អាល្លឺម៉ង់ ដែលជាដៃគូឧត្ថម្ភធំរបស់ FIFA ក្នុងការឧបត្ថម្ភ បាល់ពេលប្រកួត World Cup ម្តងៗ និងយូរជាងគេផងដែរចាប់តាំងពីឆ្នាំ១៩៧០មក ជាមួយនឹងការផុតកំណត់កិច្ចសន្យារហូតដល់ ឆ្នាំ២០៣០ ខាងមុខ៕
