(បាដាដ)៖ ក្រុមអ៊ីស្លាមជ្រុលនិយម ISIS កំពុងព្យាយាមបង្កើតនូវអាវុធគីមី និងបង្កើតសាខារបស់ខ្លួន ដើម្បីពង្រីកទីតាំងផលិត និងសាកល្បងអាវុធគីមី ដោយការផលិតអាវុធនេះ ទទួលបានជំនួយពីអ្នកវិទ្យាមកពីអ៊ីរ៉ាក់ និងស៊ីរី ព្រមទាំងលោកខាងលិចទៀតនេះ នេះបើយោងតាមឯកសារសម្ងាត់របស់ក្រុមចារកម្មអ៊ីរ៉ាក់ និងអាមេរិក និងត្រូវបានចេញផ្សាយរបស់សារព័ត៌មាន Business Insider នៅថ្ងៃទី១៩ ខែវិច្ឆិកា។
នៅក្នុងឯកសារសម្ងាត់ដែលទទួលបានពីក្រុមចារកម្មបានឲ្យដឹងថា អាវុធគីមី ដែលត្រូវបានផលិតឡើងដោយក្រុម ISIS គេនៅមិនទាន់ដឹងពីអានុភាពរបស់វាទេ ប៉ុន្តែបានដឹងថា ក្នុងចំណោមអ្នកវិទ្យាសាស្ត្រដែលចូលរួមផលិតនោះក៏មានអតីតកូនចៅរបស់ សាដាម ហ៊ូសែន។
ក្រោយពីវាយប្រហារនៅក្នុងទីក្រុងប៉ារីស លោក Manuel Valls នាយករដ្ឋមន្ត្រីបារាំង ក៏បានព្រមានផងដែរថា ក្រុម ISIS អាចនឹងប្រើវុធគីមី មកវាយប្រហារប្រទេសបារាំងជាថ្មី ប៉ុន្តែព័ត៌មានហាក់បានស្ងប់ស្ងាត់វិញ ប៉ុន្តែចំណុចនេះត្រូវបានអ្នកវិភាគបានកត់ចំណាំទុក។
ចំពោះឯកសារសម្ងាត់នេះ អាចជាការពិតព្រោះថា រដ្ឋាភិបាអ៊ីរ៉ាក់ បានចែកចាយនូវម៉ាសការពារឧស្ម័ន និងសម្លៀកបំពាក់ការពារធាតុគីមីដល់កងទ័ពដែលឈរជើងនៅភាគខាងលិច និងខាងជើងទីក្រុងបាដាដ ហើយម៉ាស និងសម្លៀកបំពាក់ទាំងនោះ មាន ២៥ភាគរយត្រូវបានគេដឹងថា រុស្ស៊ីជាអ្នកផ្គត់ផ្គង់៕
