(ព្យុងយ៉ាង)៖ សាធារណរដ្ឋប្រជាមានិតប្រជាធិបតេយ្យកូរ៉េ នាថ្ងៃអាទិត្យម្សិលមិញបានធ្វើការព្រមានទៅប្រទេសកូរ៉េខាងត្បូង កុំឲ្យបង្ករឿងក្នុងដែនទឹកកំពុងមានជម្លោះ ដែលស្ថិតនៅសមុទ្រខាងលិច នៅមុនថ្ងៃខួបប្រាំឆ្នាំនៃការបាញ់កាំភ្លើងធំនៅកោះ Yeonpyeong នេះបើយោងតាមសេចក្តីរាយការណ៍របស់ភ្នាក់ងារសារព័ត៌មាន ចិនស៊ិនហួ ចេញផ្សាយនៅថ្ងៃទី២២ ខែវិច្ឆិកា ឆ្នាំ២០១៥នេះ។
សារព័ត៌មាន CKNA បានរាយការណ៍ដោយដកស្រង់សំដី អ្នកនាំពាក្យរបស់យោធាកូរ៉េខាងជើង ដែលបានចោទប្រកាន់យោធាកូរ៉េខាងត្បូងថា បានរៀបចំគម្រោងត្រៀមបាញ់ប្រហារក្នុងដែនទឹកកូរ៉េខាងជើង នៅថ្ងៃចន្ទខាងមុខ។ ឆ្លើយតបបញ្ហានេះរដ្ឋាភិបាលក្រុង ព្យុងយ៉ាងបានព្រមានថា ប្រសិនបើរដ្ឋាភិបាលក្រុងសេអ៊ូល បាញ់ប្រហារក្នុងដែនទឹកកូរ៉េខាងជើង នោះពួកគេទទួលបាននូវការសងសឹកដោយគ្មានត្រាប្រណីឡើយ៕
