(ប៉េកាំង)៖ រដ្ឋាភិបាលចិនបានជម្រុញឲ្យសហរដ្ឋអាម៉េរិក និងជប៉ុន កុំបង្ហាញនូវសកម្មភាពយោធា និងបង្កើតភាពតានតឹង នៅតំបន់សមុទ្រចិនភាគខាងត្បូង នេះបើតាមព័ត៌មាន Xinhua ចេញផ្សាយនៅយប់ថ្ងៃទី២៦ ខែវិច្ចិកា ឆ្នាំ២០១៥នេះ។
រដ្ឋមន្ត្រីការពារជាតិជប៉ុន លោក Nakatani និងលោក Harry Harris មេបញ្ជាការអាម៉េរិកប៉ាស៊ីហ្វិក បានព្រមព្រៀងគ្នាក្នុងការបន្តនូវសមយុទ្ធរួមគ្នា រវាងយោធាអាម៉េរិក និងកងកម្លាំងជើងទឹកការពារជាតិជប៉ុន ព្រមទាំងបាននឹងកំពុងជួយដល់បណ្តាប្រទេសអាស៊ាន ក្នុងការបង្កើននូវសមត្ថភាពយោធារបស់ពួកគេផងដែរ។
«យើងស្នើឲ្យបណ្តាប្រទេសដែលជាប់ពាក់ព័ន្ធ ធ្វើនូវអ្វីដែលនាំមកនូវសន្តិភាព និងស្ថេរភាព នៅតំបន់សមុទ្រចិនភាគខាងត្បូង ហើយជៀសវាងការបង្ហាញសាច់ដុំ បង្កើតភាពតានតឹង នៅក្នុងតំបន់» នេះបើតាមអ្នកនាំពាក្យក្រសួងការបរទេសចិន លោក Hong Lei បានឲ្យដឹងយ៉ាងដូច្នេះ។
ក្នុងនោះផងដែរ នៅថ្ងៃព្រហស្បតិ៍ម្សិលមិញ ក្រសួងការពារជាតិចិន បានព្រមានសហរដ្ឋអាម៉េរិក កុំបញ្ជូននាវាយោធាជាថ្មីម្តងទៀត មកកាន់ដែនដីរបស់ចិន នៅតំបន់សមុទ្រចិនភាគខាងត្បូង បន្ទាប់ពីសហរដ្ឋអាម៉េរិក បានធ្វើឲ្យចិនខឹងសម្បារ ដោយបើកនាវាចម្បាំង USS Lassen ចូលមកកាន់ដែនទឹកជិតតំបន់ Zhubi Reef៕