(ម៉ូស្គូ)៖ យ៉ាងហោចណាស់មនុស្ស ចំនួន១០នាក់បានស្លាប់ នៅក្នុងគ្រោះថ្នាក់ធ្លាក់ឧទ្ធម្ភាគចក្រ ប្រភេទ Mi-8 នៅភាគខាងជើងតំបន់ Krasnoyarsk ប្រទេសរុស្ស៊ី នេះបើតាមព័ត៌មាន Interfax របស់រុស្ស៊ី ចេញផ្សាយនៅយប់ថ្ងៃទី២៦ ខែវិច្ចិកា ឆ្នាំ២០១៥នេះ។
«ទិន្នន័យចុងក្រោយបំផុត បានបង្ហាញថា មានមនុស្សចំនួន១០នាក់បានស្លាប់ នៅក្នុងហេតុការណ៍ធ្លាក់ឧទ្ធម្ភាគចក្រ និងមនុស្ស១៥នាក់ទៀត បានទទួលរងរបួស ហើយត្រូវបានបញ្ជូនទៅមន្ទីរពេទ្យ» នេះបើតាមរបាយការណ៍ ពីមន្ត្រីប៉ូលិសបានឲ្យដឹងយ៉ាងដូច្នេះ។
ក្រសួងសង្គ្រោះបន្ទាន់រុស្ស៊ី បានបញ្ជាក់ថា មានមនុស្សទាំងអស់ចំនួន២៥នាក់ ជិះនៅលើឧទ្ធម្ភាគចក្រ ក្នុងនោះ ៣នាក់ជាសហសេវិក និង២២នាក់ជាអ្នកធ្វើដំណើរ។ ឧទ្ធម្ភាគចក្រនេះ បានជួបគ្រោះថ្នាក់ ខណៈធ្វើដំណើរទៅកាន់តំបន់រ៉ែប្រេងមួយកន្លែង ដោយវាបានធ្លាក់នៅជិតអាកាសយាន្តដ្ឋាន Igarka ដោយសាកសពឧទ្ធម្ភាគចក្រ បានសណ្តូកនៅលើច្រាំងទន្លេ Yenisey។ មូលហេតុនៃការធ្លាក់ ពុំទាន់ដឹងនៅឡើយទេ ប៉ុន្តែប្រភពមិនបញ្ចេញឈ្មោះមួយ បានឲ្យដឹងថា វាអាចបណ្តាលមកពីបញ្ហាបច្ចេកទេសគ្រឿងម៉ាស៊ីន។
សូមជម្រាបថា Mi-8 ជាឧទ្ធម្ភាគចក្ររចនាឡើងដោយរុស្ស៊ី មានម៉ាស៊ីនភ្លោះ សម្រាប់ការដឹកជញ្ជូនខ្នាតមធ្យម ដោយមានការប្រើប្រាស់នៅជាង ៥០ប្រទេស ទូទាំងពិភពលោក៕