(ម៉ូស្គូ)៖ រដ្ឋាភិបាលក្រុងម៉ូស្គូ បានដាក់ពង្រាយនូវប្រព័ន្ធមីស៊ីលការពារដែនអាកាសប្រភេទ S-400 ដែលជាបច្ចេកវិទ្យាថ្មីចុងក្រោយបំផុតរបស់ប្រទេសរុស្ស៊ី នៅមូលដ្ឋានទ័ពអាកាស Khmeimim ក្នុងប្រទេសស៊ីរី ដែលជាផ្នែកមួយសម្រាប់ការពារសន្ដិសុខ បន្ទាប់ពីប្រទេសតួកគីបានបាញ់ទម្លាក់យន្តចម្បាំងកាលពីដើមសប្ដាហ៍នេះ នេះបើយោងតាមការចុះផ្សាយរបស់សារព័ត៌មាន RT ចេញផ្សាយនៅថ្ងៃទី២៧ ខែវិច្ឆិកា។
ការដាក់ពង្រាយមីស៊ីលនេះ ត្រូវបានគេមើលឃើញថាគឺជាការព្រមានយ៉ាងធ្ងន់ៗ និងចំៗតែម្ដងទៅដល់ប្រទេសតួកគី ព្រោះថា S-400 ជាបច្ចេកវិទ្យាថ្មីចុងក្រោយបំផុតរបស់រុស្ស៊ី ដែលត្រូវបានអ្នកជំនាញខាងផ្នែកយោធាបញ្ជាក់ថា វាអាចទប់ទល់ និងការពារបាននូវមីស៊ីលរយៈចម្ងាយខ្លី រយៈចម្ងាយវែង និងមីស៊ីលឆ្លងទ្វីប ជាពិសេសគឺមីស៊ីលល្បឿនលឿនក៏អាចការពារបានផងដែរ។
គួរបញ្ជាក់ផងដែរថា យន្តហោះចម្បាំងរបស់រុស្ស៊ីមួយគ្រឿងត្រូវបានតួកគីបាញ់ទម្លាក់នៅព្រំដែនស៊ីរី នៅក្នុងប្រតិបត្តិការកម្ទេចក្រុម ISIS នៅក្នុងប្រទេសស៊ីរី ដោយពីឡុតម្នាក់ត្រូវបានក្រុមឧទ្ទាមនៅក្នុងប្រទេសស៊ីរីសម្លាប់ និងម្នាក់ទៀតត្រូវបានជួយសង្គ្រោះ៕