(ម៉ូស្គូ)៖ យោងតាមព័ត៌មាន Channel News Asia ចេញផ្សាយនៅយប់ថ្ងៃទី២៦ ខែវិច្ចិកា ឆ្នាំ២០១៥ បានឲ្យដឹងថា នាយករដ្ឋមន្ត្រីរុស្ស៊ី លោក Dmitry Medvedev បានដាក់បញ្ជាឲ្យរដ្ឋាភិបាលទីក្រុងម៉ូស្គូ បង្កើតនូវវិធានការសេដ្ឋកិច្ច ប្រឆាំងទៅនឹងតួកគី ក្នុងនោះរួមទាំងការបង្កកនូវគម្រោងវិនិយោគរួមមួយចំនួន ជាមួយតួកគីផងដែរ ។
ដោយការដាក់បញ្ជាតបតរបស់ លោកនាយករដ្ឋមន្ត្រីនេះ បានធ្វើឡើងបន្ទាប់ពីយន្តហោះចម្បាំងមួយគ្រឿងរបស់ខ្លួន ត្រូវបានតួកគីបាញ់ទម្លាក់ នៅជិតតំបន់ព្រំដែនជាមួយស៊ីរី កាលពីពេលថ្មីៗកន្លងទៅនេះ ជាមួយនឹងហេតុផលថា យន្តហោះចម្បាំងរុស្ស៊ី បានបំពានដែនអាកាសរបស់ខ្លួន។
លោកនាយករដ្ឋមន្ត្រី Dmitry Medvedev ក៏បានប្រាប់នៅក្នុងកិច្ចប្រជុំគណៈរដ្ឋមន្ត្រី ដែលធ្វើឡើងនៅថ្ងៃព្រហស្បតិ៍ម្សិលមិញដែរថា វិធានការគួរតែរួមបញ្ចូលទាំង ការដាក់លក្ខខណ្ឌក្នុងការនាំចូលអាហារ មកពីប្រទេសតួកគីផងដែរ៕