(តួកគី)៖ ប្រធានាធិបតីតួកគី លោក Recep Tayyip Erdogan បានថ្លែងប្រាប់សារព័ត៌មាន CNN នៅក្នុងកិច្ចសម្ភាសន៍ផ្ដាច់មុខថា តួកគីនឹងមិនសុំទោសចំពោះការបាញ់ទម្លាក់យន្តហោះចម្បាំងរុស្ស៊ីនោះទេ ព្រោះវាបានរំលោភដែនអាកាសរបស់ខ្លួន នេះបើយោងតាមការចេញផ្សាយរបស់ CNN នៅប៉ុន្មាននាទីមុននេះ។
«ខ្ញុំគិតថា រដ្ឋាភិបាលតួកគីមិនត្រូវសុំទោសចំពោះទង្វើនេះនោះទេ ផ្ទុយទៅវិញ អ្នកដែលបានរំលោភដែនអាកាសរបស់យើងទេ ដែលត្រូវសុំទោសនោះ។ អាកាសយានិក និងកងកម្លាំងប្រដាប់អាវុធរបស់យើង គឺបានបំពេញភារកិច្ចរបស់ខ្លួនដូចធម្មតា ហើយវាក៏ជាឆ្លើយបតទៅយ៉ាងប្រសើរ ព្រោះរុស្ស៊ីបានរំលោភដែនអាកាស បើទោះបីជាយើងបានជួនដំណឹងជាច្រើនដងក្ដី»។ នេះជាសំដីរបស់លោក Recep Tayyip Erdogan បានថ្លែងប្រាប់ CNN។
គួរបញ្ជាក់ផងដែរថា យន្តហោះចម្បាំងរបស់រុស្ស៊ីមួយគ្រឿងត្រូវបានតួកគីបាញ់ទម្លាក់នៅព្រំដែនស៊ីរី នៅក្នុងប្រតិបត្តិការកម្ទេចក្រុម ISIS នៅក្នុងប្រទេសស៊ីរី ដោយពីឡុតម្នាក់ត្រូវបានក្រុមឧទ្ទាមនៅក្នុងប្រទេសស៊ីរីសម្លាប់ និងម្នាក់ទៀតត្រូវបានជួយសង្គ្រោះ៕