(ដេលី)៖ រដ្ឋាភិបាលឥណ្ឌា បានទទួលជោគជ័យ ក្នុងការបាញ់សាកល្បង គ្រាប់មីស៊ីលផ្ទុកនុយក្លេអ៊ែ ប្រភេទ Prithvi II ដែលផលិតឡើងដោយខ្លួនឯង ចេញពីមូលដ្ឋានការពារជាតិមួយ នៅភាគខាងកើតរដ្ឋ Odisha នេះបើតាមព័ត៌មានទីភ្នាក់ងារព័ត៌មានចិនស៊ិនហួ ចេញផ្សាយនៅថ្ងៃទី២៦ ខែវិច្ចិកា ឆ្នាំ២០១៥។
«គ្រាប់មីស៊ីលបាញ់ចេញពីផ្ទៃដី ជាមួយនឹងរយៈចម្ងាយ ៣៥០គីឡូម៉ែត្រ ហើយមានសមត្ថភាព ផ្ទុកក្បាលគ្រាប់នុយក្លេអ៊ែទម្ងន់ ១ពាន់គីឡូក្រាម ត្រូវបានបាញ់សាកល្បងទទួលបានភាពជោគជ័យ ដោយកងយោធាឥណ្ឌា»។ នេះបើតាមប្រភពមួយបានឲ្យដឹងយ៉ាងដូច្នេះ។
Prithvi II មានម៉ាស៊ីន២ ដែលប្រើប្រាស់កម្លាំងរុញច្រាន ដោយសារធាតុរាវ ហើយវាត្រូវបានដាក់បញ្ចូលប្រើប្រាស់ ក្នុងកងកម្លាំងទ័ព ក្នុងឆ្នាំ២០០៣ បន្ទាប់ពីអង្គការអភិវឌ្ឍន៍ និងស្រាវជ្រាវការពារជាតិរបស់រដ្ឋ បានអភិវឌ្ឍន៍វាឡើងនៅក្នុង កម្មវិធីអភិវឌ្ឍន៍មីស៊ីលរបស់ឥណ្ឌា។
សូមជម្រាបថា ការបាញ់សាកល្បងកាលពីលើកមុន បានធ្វើឡើងនៅក្នុងខែកុម្ភៈ ឆ្នាំ២០១៥កន្លងទៅ ប្រកបដោយភាពជោគជ័យ ចេញពីទីតាំងដូច្នេះ នៃការបាញ់ចុងក្រោយនេះ នៅក្នុងរដ្ឋ Odisha៕
