(អាល្លឺម៉ង់)៖ មេជួញដូរអាវុធដ៏ធំមួយនៅក្នុងប្រទេសអាល្លឺម៉ង់ត្រូវបានចាប់ខ្លួន បន្ទាប់ពីក្រុមស៊ើបការសម្ងាត់រកឃើញថា មានលក់អាវុធក្រុមភេរវករ ដែលធ្វើភេរវកម្មនៅក្នុងទីក្រុងប៉ារីសកាលពីកន្លងទៅ នេះបើយោងតាមការចុះផ្សាយរបស់សារព័ត៌មានក្នុងស្រុកអាល្លឺម៉ង់ Bild-Zeitung ចេញផ្សាយនៅថ្ងៃទី២៧ ខែវិច្ឆិកា។
នៅក្នុងឯកសាររបស់ក្រុមស៊ើបការសម្ងាត់បានឲ្យដឹងថា មេជួញដូរអាវុធដ៏ធំនេះ បានលក់អាវុធតាមអនឡាញឲ្យក្រុមមភេរវករ ដែលមានមូលដ្ឋាននៅក្នុងទីក្រុងប៉ារីស ដោយកាំភ្លើងទាំងនោះត្រូវបានយកមកប្រើធ្វើភេរវកម្មនៅកណ្ដាលក្រុងប៉ារីស ដូច្នេះហើយទើបក្រុមស៊ើបអង្កេតស្រាវជ្រាវរកឃើញប្រភពចែកចាយ។
គួរបញ្ជាក់ផងដែរថា កាលពីថ្ងៃទី១៣ ខែវិច្ឆិកាកន្លងទៅនេះ ក្រុមភេរវករបានធ្វើការវាយប្រហារនៅកណ្ដាលក្រុងប៉ារីស ដោយបានសម្លាប់មនុស្សជាង១៣២នាក់ និងរបួសជាច្រើននាក់ ហើយការវាយប្រហារនេះ ត្រូវបានក្រុម ISIS អះអាងថាជាទង្វើរបស់ពួកគេ៕
