(ប៉ូឡូញ)៖ រដ្ឋាភិបាលនៃប្រទេសប៉ូឡូញ បាននឹងកំពុងតែពិចារណា ទៅលើគម្រោងផ្អាកទិញមីស៊ីល និងឧទ្ធម្ភាគចក្រពីក្រុមហ៊ុនអាមេរិក ដោយបានលើកហេតុផលថា «តម្លៃខ្ពស់ ហើយការដឹកជញ្ជូនមានភាពយឺតយ៉ាវ មិនដូចអ្វីដែលបានកំណត់នៅក្នុងកិច្ចព្រមព្រៀង» នេះបើយោងតាមការចេញផ្សាយរបស់សារព័ត៌មាន Reuters ចេញផ្សាយនៅថ្ងៃទី២៧ ខែវិច្ឆិកា។
លោក Antoni Macierewicz រដ្ឋមន្ត្រីក្រសួងការពារជាតិថ្មី មកពីគណបក្សប្រឆាំង ដែលទើបនឹងឈ្នះឆ្នោតថ្មីៗនេះ បានបញ្ជាក់ថា រដ្ឋាភិបាលប៉ូឡូញ បានចុះកិច្ចព្រមព្រៀងទិញមីស៊ីល និងឧទ្ធម្ភាគចក្រពីក្រុមហ៊ុនអាមេរិកក្នុងតម្លៃ ៥,៣ពាន់លានដុល្លារអាមេរិក ដើម្បីពង្រឹងផ្នែកយោធា ក្រោយពេលមានភាពតានតឹងនៅព្រំដែនរវាងប្រទេសរុស្ស៊ី និងអ៊ុយក្រែន។
លោករដ្ឋមន្ត្រីរូបនេះក៏បានបញ្ជាក់បន្ថែមទៀតថា ក្រុមហ៊ុនអាមេរិក និងអង់គ្លេស អាចធ្វើការដេញថ្លៃសម្រាប់គម្រោងទិញអាវុធរបស់រដ្ឋាភិបាលនៃប្រទេសប៉ូឡូញ ប្រសិនបើគម្រោងខាងលើត្រូវបានលុបចោល៕
