(ម៉ូស្គូ)៖ វិមានគ្រីមឡាំងរបស់រុស្ស៊ី បានបញ្ជាក់នៅថ្ងៃសុក្រនេះថា ប្រធានាធិបតីតួកគី លោក Recep Tayyip Erdogan បានព្យាយាមទូរស័ព្ទទាក់ទង ទៅកាន់ប្រធានាធិបតីរុស្ស៊ី លោក Vladimir Putin បន្ទាប់ពីមានហេតុការណ៍បាញ់ទម្លាក់ យន្តហោះចម្បាំងមួយគ្រឿង របស់រុស្ស៊ី ដោយកងកម្លាំងតួកគី នេះបើតាមព័ត៌មាន Xinhua ចេញផ្សាយនៅយប់ថ្ងៃទី២៧ ខែវិច្ចិកា ឆ្នាំ២០១៥នេះ។
«ការទូរស័ព្ទត្រូវបានធ្វើឡើងប្រមាណ ៧ទៅ៨ម៉ោង បន្ទាប់ពីហេតុការណ៍កើតឡើង» នេះបើតាមសម្តីអ្នកនាំពាក្យវិមាន Kremlin លោក Dmitry Peskov បានឲ្យដឹងយ៉ាងដូច្នេះ។ ប្រធានាធិបតីតួកគី បានឲ្យដឹងក្នុងកិច្ចសម្ភាសន៍ជាមួយស្ថានីយ៍ទូរទស្សន៍មួយរបស់បារាំងថា លោកបានព្យាយាមទូរស័ព្ទ ទៅកាន់លោក Putin បន្ទាប់ពីហេតុការណ៍កើតឡើង ប៉ុន្តែមិនអាចភ្ជាប់ទំនាក់ទំនងបាននោះទេ។ លើសពីនេះ ប្រធានាធិបតីតួកគី ក៏បានស្នើឲ្យមានកិច្ចប្រជុំមួយ ជាមួយនឹងលោក Putin នៅសប្តាហ៍ក្រោយ ក្នុងទីក្រុងប៉ារីសផងដែរ ប៉ុន្តែមិនទាន់ទទួលបាន នូវការឆ្លើយតបពីភាគីរុស្ស៊ីនៅឡើយទេ។
សូមជំរាបថា ទំនាក់ទំនងរវាងតួកគី និងរុស្ស៊ី ត្រូវបានធ្លាក់ចុះ បន្ទាប់ពីមានហេតុការណ៍ បាញ់ទម្លាក់យន្តហោះចម្បាំងរបស់រុស្ស៊ី ជាមួយនឹងការអះអាងរបស់រដ្ឋាភិបាលទីក្រុង Ankara ថា យន្តហោះចម្បាំងប្រភេទ Su-24 របស់រុស្ស៊ី បានបំពានដែនអាកាសរបស់ខ្លួន៕
