(នីហ្សេរីយ៉ា)៖ យ៉ាងហោចណាស់មនុស្ស ២១នាក់បានស្លាប់ បន្ទាប់ពីក្រុមឧទ្ទាម Boko Haram បំផ្ទុះគ្រាប់បែកអត្តឃាតចូលហ្វូងមនុស្សដែលកំពុងដង្ហែក្បួន Shia របស់សាសនាម៉ូស្លីម នៅរដ្ឋ Kano ភាគខាងជើងនៃប្រទេសនីហ្សេរីយ៉ា នេះបើយោងតាមការចេញផ្សាយរបស់សារព័ត៌មាន RT ចេញផ្សាយនៅថ្ងៃទី២៨ ខែវិច្ឆិកា។
អាជ្ញធរបានបញ្ជាក់ថា សកម្មជនរបស់ក្រុមឧទ្ទាម Boko Haram បានស្លៀកពាក់ខ្មៅដូចអ្នកដង្ហែក្បួន និងបានចូលបន្លំខ្លួននៅក្នុងក្បួន រួចក៏ធ្វើសកម្មភាពបំផ្ទុះគ្រាប់បែកអត្តឃាតតែម្ដង ហើយបើតាមការបញ្ជាក់សកម្មជនរបស់ក្រុមឧទ្ទាម Boko Haram ដែលបំផ្ទុះគ្រាប់បែកនោះគឺជាបុរសវ័យក្មេង។
គួរបញ្ជាក់ផងដែរថា នៅក្នុងប្រទេសនីហ្សេរីយ៉ា ក្រុមឧទ្ទាម Boko Haram បានសម្លាប់មនុស្ស ៦.៦៤៤នាក់ ចាប់តាំងពីឆ្នាំ២០១៤ ដោយតួលេខនេះច្រើនជាងក្រុម ISIS ដែលមានត្រឹមតែ ៦.០៧៣នាក់៕
