(ម៉ូស្គូ)៖ ប្រធានាធិបតីរុស្ស៊ី លោក Vladimir Putin បានអនុម័តដាក់ទណ្ឌកម្មសេដ្ឋកិច្ចលើប្រទេសតួកគី បន្ទាប់ពីប្រទេសតួកគីបានបាញ់ទម្លាក់យន្តហោះចម្បាំងរបស់ខ្លួននៅព្រំដែនស៊ីរី នេះបើយោងតាមការចេញផ្សាយរបស់សារព័ត៌មាន Reuters ចេញផ្សាយនៅថ្ងៃទី២៩ ខែវិច្ឆិកា។
នៅក្នុងអនុក្រឹត្យដែលចុះហត្ថលេខាដោយលោក Putin ក៏បានធ្វើការហាមឃាត់ជើងហោះហើរទាំងអស់សម្រាប់ទៅកាន់ប្រទេសតួកគី ដោយក្នុងនោះក្រុមហ៊ុនទេសចរណ៍ក៏ត្រូវបានហាមឃាត់ ជាពិសេសគឺមិនអនុញ្ញាតឲ្យជួលមនុស្សមកពីប្រទេសតួកគីឲ្យធ្វើការនៅក្នុងប្រទេសរុស្ស៊ីផងដែរ។
ពាក់ព័ន្ធនឹងការដាក់ទណ្ឌកម្មសេដ្ឋកិច្ចនេះ ត្រូវបានមន្ត្រីអ្នកនាំពាក្យរបស់រដ្ឋាភិបាលតួកគី យល់ឃើញថា វាកាន់អាក្រក់ឡើយ និងកាន់តែធ្វើឲ្យប្រទេសទាំងពីរប្រឈមមុខនឹងបញ្ហាជាច្រើន ខណៈដែលរុស្ស៊ីជាអ្នកខុស ព្រោះយន្តហោះរុស្ស៊ី បានហោះរំលោភដែនអាកាសរបស់ខ្លួន។
គួរបញ្ជាក់ផងដែរថា កាលពីថ្ងៃទី២៤ ខែវិច្ឆិកាកន្លងទៅនេះ យន្តហោះចម្បាំងរបស់រុស្ស៊ីមួយគ្រឿងត្រូវបានទាហានតួកគីបាញ់ធ្លាក់ នៅក្នុងប្រតិបត្តិការកម្ទេចក្រុម ISIS នៅក្នុងប្រទេសរុស្ស៊ី ដោយតួកគីបានបញ្ជាក់ថាយន្តហោះរុស្ស៊ី បានហោះរំលោភដែនអាកាស ហើយមិនស្ដាប់ការព្រមានទើបបាញ់ទម្លាក់តែម្ដង៕
