(វ៉ាស៊ីនតោន)៖ សកម្មប្រយុទ្ធរបស់ពួកឧទ្ទាមរដ្ឋឥស្លាម ISIS រាប់ពាន់នាក់ បានប្រមូលផ្តុំគ្នា ក្នុងទឹកដីសហរដ្ឋអាម៉េរិក ដែលតួលេខនេះមានចំនួនច្រើនលើសពីរំពឹងទុក ជម្រុញឲ្យមានការលើកឡើងថា ក្រុមអ្នកគាំទ្រទាំងនោះអាចនឹងរៀបចំគម្រោងការវាយប្រហារណាមួយ ដែលស្រដៀងគ្នានឹងការវាយប្រហារនៅប៉ារីសផងដែរ នេះបើយោងតាមភ្នាក់ងារសារព័ត៌មាន WND ចេញផ្សាយនៅថ្ងៃទី២៨ ខែវិច្ឆិកា ឆ្នាំ២០១៥នេះ។
សូមជម្រាបថា កន្លងមក សហរដ្ឋអាម៉េរិកបានអនុញ្ញាតឲ្យជនអន្តោប្រវេសន៍៧ម៉ឺននាក់ ចូលមករស់នៅសហរដ្ឋអាម៉េរិក ក្នុងមួយឆ្នាំ ហើយគោលការណ៍ត្រូវបានអនុវត្តជាច្រើនឆ្នាំមកហើយ។ ជនភៀសខ្លួនទាំងនោះភាគច្រើន មានប្រភពមកពីប្រទេសកាន់សាសនាឥស្លាម ដូចជាប្រទេស សូម៉ាលី និងអ៊ីរ៉ាក់ជាដើម ដែលមានពួកសកម្មជនជីហាត កំពុងធ្វើសកម្មភាពយ៉ាងខ្លាំងក្លា។ ជាមួយគ្នានេះដែរ ប្រធានាធិបតីសហរដ្ឋអាម៉េរិក លោក អូបាម៉ា បានប្តេជ្ញាថានឹងបង្កើនចំនួនជនអន្តោប្រវេសន៍រហូតដល់៨៥ពាន់ ទៅ១០០ពាន់នាក់ក្នុងរយៈពេលប៉ុន្មានឆ្នាំខាងមុខ៕