(តួកគី)៖ នាយករដ្ឋមន្ត្រីតួកគី លោក Ahmed Davutoglu បានថ្លែងឲ្យដឹងថា សាកសពពីឡុតយន្តហោះរុស្ស៊ី Su-24 ដែលត្រូវបានបាញ់ទម្លាក់ដោយទាហានតួកគី នៅព្រំដែនស៊ីរី នៅពេលនេះត្រូវបានបញ្ជូនមកដល់ប្រទេសតួកគីរួច ហើយនឹងបញ្ជូនទៅកាន់ប្រទេសរុស្ស៊ីឆាប់ៗនេះបើយោងតាមការចេញផ្សាយរបស់ CNN នៅថ្ងៃទី៣០ ខែវិច្ឆិកា។
គួរបញ្ជាក់ផងដែរថា យន្តហោះចម្បាំងរុស្ស៊ី Su-24 ត្រូវបានទាហានតួកគីបាញ់ទម្លាក់កាលពីថ្ងៃទី២៤ ខែវិច្ឆិកា នៅក្នុងប្រតិបត្តិការកម្ទេចក្រុម ISIS នៅក្នុងប្រទេសស៊ីរី ដោយបានចោទថា យន្តហោះរុស្ស៊ីបានរំលោភដែនអាកាស ហើយពីឡុតទាំងពីររូបបានចាកចេញពីយន្តហោះមុនពេលផ្ទុះឆេះ ប៉ុន្តែពីឡុតម្នាក់ត្រូវបានក្រុមឧទ្ទាមស៊ីរីសម្លាប់ ចំណែកម្នាក់ទៀតត្រូវបានជួយសង្គ្រោះ៕