(កាប៊ុល)៖ ស្ថានទូតសហរដ្ឋអាមេរិកប្រចាំទីក្រុងកាប៊ុល បានទទួលនូវរបាយការណ៍យ៉ាងច្បាស់លាស់ និងគួរឲ្យទុកចិត្តមួយ ស្តីពីគម្រោងវាយប្រហារក្នុងប្រទេសអាហ្គានីស្ថានក្នុងពេលឆាប់ៗខាងមុខ នេះបើយោងតាមប្រភពពីស្ថានទូតដកស្រង់ដោយសារព័ត៌មាន CNN ចេញផ្សាយនៅថ្ងៃទី៣០ ខែវិច្ឆិកា ឆ្នាំ២០១៥នេះ។ ការវាយប្រហារនេះអាចនឹងកើតឡើងក្នុងរយៈពេល ៤៨ម៉ោងខាងមុខ នេះបើយោងតាមសេចក្តីថ្លែងការណ៍ពីស្ថានទូត។
ប្រភពដដែលបានសង្កត់ធ្ងន់ថា «ក្នុងអំឡុងនៃការគំរាមកំហែងនេះ ស្ថានទូតសហរដ្ឋអាមេរិក សូមអំពាវនាវយ៉ាងទទូចដល់ប្រជាពលរដ្ឋអាមេរិក ធ្វើយ៉ាងបង្កើនការប្រុងប្រយ័ត្នក្នុងករណីធ្វើដំណើរ ឬរស់នៅក្នុងរដ្ឋធានីកាប៊ុល»។ យ៉ាងនេះក្តី មិនទាន់មានរបាយការណ៍ណាមួយបង្ហាញពីគោលដៅ ពេលវេលា និងមធ្យោបាយនៃការវាយប្រហារនៅឡើយទេ៕
