(កូឡាឡាំពួ)៖ គណៈកម្មាការសុវត្ថិភាពដឹកជញ្ជូនជាតិរបស់ឥណ្ឌូនេស៊ី (NTSC) បានបញ្ជាក់ថា ករណីធ្លាក់យន្តហោះ AirAsia QZ8501 នៅក្នុងសមុទ្រ Java Sea កាលពីឆ្នាំមុនគឺដោយសារបញ្ហាបច្ចេកទេសធ្លាក់ធ្ងរ ទើបមិនអាចធ្វើឲ្យពីឡុតគ្រប់គ្រងយន្តហោះបាន នេះបើយោងតាមការចេញផ្សាយរបស់សារព័ត៌មាន Channel News Asia ចេញផ្សាយនៅមុននេះបន្ដិច។
នៅក្នុងរបាយការណ៍របស់ NTSC បានបង្ហាញឲ្យដឹងថា បញ្ហាធំចម្បងដែលនាំឲ្យធ្លាក់យន្តហោះគឺបញ្ហាប្រព័ន្ធចង្កូត ទើបមិនអាចគ្រប់គ្រងយន្តហោះបាន ផ្ទុយស្រឡះពីរបាយការណ៍ជំហានដំបូងថា យន្តហោះធ្លាក់ដោយសារបញ្ហាអាកាសធាតុ។
គួរបញ្ជាក់ផងដែរថា យន្តហោះ AirAsia QZ8501 បានធ្វើដំណើរពីទីក្រុង Surabaya ប្រទេសឥណ្ឌូនេស៊ី ទៅកាន់ទីក្រុងសិង្ហាបុរី ជាមួយនឹងអ្នកដំណើរ ១៥៥នាក់ និងសហនាវិក ៧នាក់ បានធ្លាក់នៅសមុទ្រ Java Sea កាលពីថ្ងៃទី២៨ ខែធ្នូ ឆ្នាំ២០១៤ ដោយមនុស្សនៅលើយន្តហោះបានស្លាប់ទាំងអស់៕