(តួកគី)៖ តុលាការសិទ្ធិមនុស្សរបស់អឺរ៉ុប បានលើកឡើងថា តួកគីបានបំពាន លើអនុសញ្ញាស្តីពីសេរីភាពនៃការបញ្ចេញមតិ បន្ទាប់ពីតួកគីបានបិទនូវគេហទំព័រ YouTube អស់រយៈពេលជាង ២ឆ្នាំកន្លងមក នេះបើយោងតាមព័ត៌មាន AFP ចេញផ្សាយនៅយប់ថ្ងៃទី១ ខែធ្នូ ឆ្នាំ២០១៥។
តុលាការនៅរដ្ឋធានី Ankara របស់តួកគី បានបិទការចូលទៅកាន់គេហទំព័រ ចែករំលែកវីដេអូមួយនេះ ចាប់តាំងពីខែឧសភា ឆ្នាំ២០០៨ រហូតដល់ខែធ្នូ ឆ្នាំ២០១០ ពាក់ព័ន្ធនឹងវីដេអូចំនួន១០ ដែលបានចោទប្រកាន់ថា បានប្រមាថទៅនឹងសម័យទំនើប របស់បិតាស្ថាបនិក Mustafa Kemal Ataturk កសាងជាតិរបស់តួកគី។
«ការបិទដោយគ្មានការអនុញ្ញាត ឲ្យចូលស្របច្បាប់ ទៅកាន់គេហទំព័រ YouTube គឺបានរំលោភសិទ្ធិក្នុងការទទួលបានព័ត៌មាន និងការចែករំលែកដំណឹង» នេះបើតាមអង្គការសិទ្ធិមនុស្សមួយ មានមូលដ្ឋាននៅទីក្រុង Strasbourg ប្រទេសបារាំង បានឲ្យដឹងយ៉ាងដូច្នេះ។ ការបិទគេហទំព័រ YouTube រយៈពេលដ៏វែង និងគេហទំព័ររាប់ពាន់ផ្សេងទៀតនោះ បានបណ្តាលឲ្យមានការព្រួយបារម្ភយ៉ាងខ្លាំង អំពីសេរីភាពនៃការបញ្ចេញមតិ ក្រោមការដឹកនាំរបស់ អតីតនាយករដ្ឋមន្ត្រីតួកគី និងប្រធានាធិបតី នាពេលបច្ចុប្បន្នគឺលោក Recep Tayyip Erdogan ដែលក្រុមអ្នករិះគន់បានលើកឡើងថា ប្រធានាធិបតីរូបនេះ កំពុងពង្រីកអំណាចផ្តាច់ការ។
គួរជម្រាបថា មុនពេលគេហទំព័រ YouTube ត្រូវបានបិទ វាគឺជាគេហទំព័រមានប្រជាប្រិយភាពជាងគេ ចំណាត់ថ្នាក់ទី៥ នៅក្នុងប្រទេសតួកគី៕