(បារាំង)៖ ប្រធានាធិបតីសហរដ្ឋអាមេរិក លោក Barack Obama បានអំពាវនាវឲ្យរុស្ស៊ី និងតួកគីបញ្ចប់ជម្លោះរឿងធ្លាក់យន្តហោះចម្បាំងរុស្ស៊ី ហើយងាកទៅផ្ដោតសំខាន់លើការកម្ចាត់ក្រុម ISIS វិញ នេះបើយោងតាមការចេញផ្សាយរបស់ Channel News Asia នៅថ្ងៃទី០២ ខែធ្នូ ឆ្នាំ២០១៥។
ការអំពាវនាវរបស់លោក Obama បានធ្វើឡើងក្រោយពេលដែលស្ថានភាពជម្លោះរវាងប្រទេសរុស្ស៊ី និងតួកគី កាន់តែតានតឹងឡើង ក្រោយពេលតួកគីបាញ់ទម្លាក់យន្តហោះចម្បាំងរុស្ស៊ី នៅព្រំដែនស៊ីរី ដោយបានចោទថា រុស្ស៊ីបានរំលោភដែនអាកាសរបស់ខ្លួន ហើយមកដល់ពេលនេះ តួកគីបានរងការចោទប្រកាន់ពីរុស្ស៊ីថា បានទទួលទិញប្រេងពីក្រុម ISIS ទើបបាញ់ទម្លាក់យន្តហោះរុស្ស៊ី រហូតដល់មានភស្ដុតាងជាច្រើនបញ្ជាក់ថា រថយន្តដឹកប្រេង ISIS បានបើកឆ្លងកាត់ប្រទេសតួកគី តែការលើកឡើងនេះ ត្រូវបានប្រធានាធិបតីតួកគី ច្រានចោល និងអះអាងលាឈប់ពីតំណែងបើសិនជាដូចការចោទប្រកាន់មែន៕
