(មីយ៉ាន់ម៉ា)៖ ប្រធានាធិបតីមីយ៉ាន់ម៉ា លោកថេន សេន និងលោកស្រី អ៊ុងសាន ស៊ូជី បានជួបប្រជុំគ្នាអស់រយៈពេល៤៥នាទី នៅព្រឹកនេះ ដើម្បីពិភាក្សាអំពីការផ្ទេរអំណាចបន្ទាប់ពីគណបក្សសម្ព័ន្ធជាតិសម្រាប់ប្រជាធិបតេយ្យ ទទួលបានជ័យជម្នះនៃការបោះឆ្នោតយ៉ាងភ្លូកទឹកភ្លូកដី នេះបើយោងតាមការចេញផ្សាយរបស់សារព័ត៌មានមីយ៉ាន់ម៉ាថាម នៅរសៀលថ្ងៃទី០២ ខែធ្នូ។
លោក Ye Htut អ្នកនាំពាក្យរបស់ប្រធានាធិបតីមីយ៉ាន់ម៉ា បានថ្លែងឲ្យដឹងថា នៅក្នុងជំនួបរវាង លោកថេន សេន និងលោកស្រី អ៊ុងសាន ស៊ូជី គឺផ្ដោតសំខាន់លើការផ្សះផ្សាជាតិ និងការផ្ទេរតំណែង ប៉ុន្តែលោកមិនបានបញ្ជាក់អ្វីបន្ថែមក្រៅពីនេះឡើយ។
គួរបញ្ជាក់ផងដែរថា គណបក្សលោកស្រី អ៊ុងសាន ស៊ូជី បានឈ្នះឆ្នោតយ៉ាងភ្លូកទឹកភ្លូកដី ហើយលោក ថេន សេន ក៏បានសាទរ និងបញ្ជាក់ថានឹងផ្ទេរតំណែងឲ្យគណបក្សឈ្នះឆ្នោត នៅពេលដែលលទ្ធផលឆ្នោតត្រូវបានប្រកាសជាផ្លូវការ៕
