(សេអ៊ូល)៖ មន្ត្រីយោធាជាន់ខ្ពស់កូរ៉េខាងជើង លោក Hwang Pyong-so មិនបានបង្ហាញវត្ថមានជាសាធារណអស់រយៈពេលបីសប្តាហ៍មកហើយ ដោយគ្មានមូលហេតុច្បាស់លាស់ ប៉ុន្តែបញ្ហាមួយដែលអាចកើតឡើងនោះគឺ លោកអាចនឹងប្រឈមមុខនឹងការផ្លាស់ប្តូរពីតំណែង នេះបើយោងតាមការលើកឡើងរបស់អ្នកជំនាញដកស្រង់ដោយសារព័ត៌មាន Yonhap News ចេញផ្សាយនៅថ្ងៃទី០២ ខែធ្នូ ឆ្នាំ២០១៥។
យោងតាមប្រភពដែលស្និតបានឲ្យដឹងថា លោក Hwang វ័យ ៧៥ឆ្នាំ ជាប្រធានការិយាល័យនយោបាយរបស់កងយោធាប្រជាជនកូរ៉េខាងជើង បានបាត់វត្ថមានពីកម្មវិធីសាធារណៈធំៗជាច្រើន ដោយវត្ថមានចុងក្រោយបំផុតរបស់លោក គឺក្នុងពេលដែលលោកថ្លែងក្នុងកម្មវិធីមរណទុក្ខចំពោះការបាត់បង់ជីវិតយោធាកូរ៉េខាងជើង កាលពីដើមខែវិច្ឆិកាកន្លងទៅនេះ។
អ្នកជំនាញបានបញ្ជាក់ថា វាជារឿងដ៏ចម្លែកមួយ ដែលលោក Hwang មិនបានបង្ហាញវត្ថមានរួមជាមួយមេដឹកនាំផ្តាច់ការកូរ៉េខាងជើង លោក Kim Jong-un នាពេលថ្មីៗនេះ៕