(ម៉ូស្គូ)៖ យោងតាមការស្ទង់មតិរបស់ទីភ្នាក់ងារឯករាជ Levada Center បានឲ្យដឹងថា ពលរដ្ឋរុស្ស៊ី ២ភាគ៣ បានឲ្យលោក Vladimir Putin ធ្វើជាប្រធានាធិបតីរុស្ស៊ី នៅឆ្នាំ២០១៨ ដោយក្នុងនោះមានតែ ២០ភាគរយប៉ុណ្ណោះ ដែលបានសម្រេចចិត្តជ្រើសរើសមនុស្សថ្មីមកជំនួសរូបលោក នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី០៤ ខែធ្នូ។
៥៧ភាគរយនៃចំនួនមនុស្សដែលបានធ្វើការស្ទង់មតិ បានបញ្ចេញមតិថា លោក Putin គឺជាមនុស្សមួយដែលអាចធ្វើឲ្យរុស្ស៊ីរីកចម្រើន និងពិភពលោកស្គាល់រុស្ស៊ី ជាពិសេសគឺរុស្ស៊ី ក្រោមការដឹកនាំរបស់លោក បានឆ្ពោះទៅរកភាពល្អប្រសើរជាច្រើនស្ទើរតែគ្រប់វិស័យ ដូច្នេះពួគគេចង់ឲ្យលោក Putin បន្តដឹកនាំប្រទេសរុស្ស៊ីទៀត។
ចំណែកអ្នកផ្សេងក្រៅពីនេះ បានលើកឡើងថា លោក Putin គឺជាមនុស្សល្អឥតខ្ចោះ ប៉ុន្តែក៏មិនមែនមានន័យថា អ្នកថ្មីដែលឡើងកាន់តំណែងក្រោយ គេមិនអាចធ្វើបានដូចលោកនោះទេ ផ្ទុយទៅវិញ គេអាចមានចំណុចពិសេសណាមួយដែលលោក Putin គ្មាន។
គួរបញ្ជាក់ផងដែរថា ក្នុងរយៈពេល២ឆ្នាំចុងក្រោយនេះ ទស្សនាវដ្ដីដ៏ល្បីរបស់អាមេរិក Forbes បានឲ្យតម្លៃទៅលើលោក Vladimir Putin ថាជាកំពូលបុរសខ្លាំងនៅលើពិភពលោក៕