(សីរ៉ី)៖ ក្រុមឧទ្ទាមរដ្ឋឥស្លាម ISIS គំរាមកាត់ក្បាលប្រធានាធិបតីសហរដ្ឋអាម៉េរិក លោក បារ៉ាក់ អូបាម៉ា ព្រមទាំងយកសហរដ្ឋអាម៉េរិកធ្វើជាទឹកដីរបស់ពួកម៉ូស្លីម នៅក្នុងវីដេអូប្រហារជីវិតដ៏សាហាវថ្មីមួយទៀត នេះបើយោងតាមសេចក្តីរាយការណ៍ របស់ភ្នាក់ងារសារព័ត៌មាន Dailymail ចេញផ្សាយនៅថ្ងៃទី០៣ ខែធ្នូ ឆ្នាំ២០១៥នេះ។
ក្នុងវីដេអូនេះ បានបង្ហាញពីទិដ្ឋភាពពួកជីហាត ពាក់ស្រោមមុខពណ៌ខ្មៅ ឈរពីក្រោយយោធា Kurdish ម្នាក់ដែលក្រោយមកត្រូវបាន គេកាត់ក្បាល។ មុនពេលប្រហារជីវិតចំណាប់ខ្មាំង ពួកឧទ្ទាម ISIS បានព្រមានប្រធានាធិបតីរូបនេះថា «លោក អូបាម៉ា ត្រូវដឹងថា យើងនឹងវាយប្រហារទៅដល់សហរដ្ឋអាម៉េរិក»។ «លោកក៏ត្រូវដឹងផងដែរថា យើងនឹងកាត់ក្បាលរបស់លោក នៅក្នុងសេតវិមាន ព្រមទាំងយកសហរដ្ឋអាម៉េរិកធ្វើជាដែនដីរបស់ពួកម៉ូស្លីម»៕
