(ម៉ូស្គូ)៖ ប្រធានាធិបតីរុស្ស៊ី លោក Vladimir Putin នៅថ្ងៃព្រហស្បតិ៍នេះ បានគម្រាមបន្ថែមទៀត ក្នុងការដាក់ទណ្ឌកម្មប្រឆាំងនឹងតួកគី បន្ទាប់ពីបាញ់ទម្លាក់យន្តហោះចម្បាំងរបស់ខ្លួន នេះបើតាមព័ត៌មានចិនស៊ិនហួ ចេញផ្សាយនៅយប់ថ្ងៃទី០៣ ខែធ្នូ ឆ្នាំ២០១៥នេះ។
លោក Putin បានព្រមានតួកគីថា នឹងសោកស្តាយយ៉ាងខ្លាំង ចំពោះការបាញ់ទម្លាក់យន្តហោះចម្បាំង ប្រភេទ Su-24 នៅព្រំដែនស៊ីរី-តួកគី កាលពីសប្តាហ៍មុន លោកបានបញ្ជាក់ថា រុស្ស៊ីបានដឹងអំពីការធ្វើ ពាណិជ្ជកម្មប្រេងខុសច្បាប់ របស់រដ្ឋាភិបាលទីក្រុង Ankara របស់តួកគី ជាមួយនឹងក្រុមឧទ្ទាមរដ្ឋឥស្លាម (IS)។
«យើងដឹងថាអ្នកណា នៅក្នុងប្រទេសតួកគី ដែលកំពុងយកប្រយោជន៍ចូលហោប៉ៅ ហើយកំពុងអនុញ្ញាតឲ្យក្រុមភេរវកម្ម ដើម្បីទទួលបានប្រយោជន៍ ពីការប្លន់ប្រេងចេញពីប្រទេសស៊ីរី។ ប្រាក់នៃការជួញដូរប្រេងនេះហើយ ដែលក្រុមឧទ្ទាមយកទៅជួលក្រុមសកម្មប្រយុទ្ធ, ទិញអាវុធ និងរៀបចំការវាយប្រហារ ដោយឥតមនុស្សធម៌ ប្រឆាំងនឹងប្រជាពលរដ្ឋរបស់យើង» នេះបើតាសម្តីលោក Putin បានឲ្យដឹងយ៉ាងដូច្នេះ។
គួរជម្រាបថា នៅក្នុងហេតុការណ៍ បាញ់ទម្លាក់យន្តហោះចម្បាំងរបស់រុស្ស៊ី អ្នកបើកបរម្នាក់ត្រូវបានសម្លាប់ ហើយរហូតមកដល់ពេលនេះ ត្រូវបានបញ្ចុះនៅស្រុកកំណើតហើយ៕
