(លីបង់)៖ លោក Abdul Halim al-Attar វ័យ៣៣ឆ្នាំ ជាជនភៀសខ្លួនស៊ីរី ដែលដើរលក់ប៊ិចតាមដងផ្លូវ នៅក្នុងទីក្រុង Beirut ដោយដៃម្ខាងឱបកូនស្រីនឹងស្មា ហើយត្រូវបានគេថត បង្ហោះពេញបណ្ដាញសង្គម នៅពេលនេះ លោកបានបើកហាងផ្ទាល់ខ្លួន ព្រមទាំងជួយដល់ជនភៀសខ្លួនស៊ីរីឯទៀត ឲ្យមានការងារធ្វើទៀតផង។
រូបថតប៉ុន្មានសន្លឹក ដែល al-Attar ដើរលក់ប៊ិចទាំងកណ្ដាលថ្ងៃក្ដៅ ហើយកូនស្រីដេកលង់លក់នៅស្មា ជាមួយនឹងទឹកមុខដ៏គួរឲ្យអាណិតបំផុតនោះ ត្រូវបានអ្នកកាសែត និងជាអ្នកអភិវឌ្ឍន៍ គេហទំព័រនៅក្នុងប្រទេសន័រវេស ឈ្មោះ Gissur Simonarson បានយកទៅបង្ហោះ និងបង្កើតគណនី Twitter មួយដែលមានឈ្មោះថា «@buy_pens» និងបានបង្កើតយុទ្ធនាការឃោសនា រៃអង្គាសប្រាក់សម្រាប់គ្រួសារ al-Attar។
هذا حساب ناشطون غربيون تم إنشاؤه من أجل اللاجىء السوري "بائع الأقلام"للبحث عنه ومساعدته اتمنى التفاعل معهم
@Buy_Pens pic.twitter.com/EjEYLOqOqS
— عبدالعزيز العودة (@Az_Aloudah) August 26, 2015
៣ខែក្រោយមក គណនី «@buy_pens» ត្រូវបានបិទ ដោយប្រមូលបានប្រាក់ ១៨៨.៦៨៥ដុល្លារអាមេរិក ដូច្នេះហើយលោក al-Attar ក៏បានយកប្រាក់នោះទៅបើកហាងលក់នំប៉័ង ហាងលក់សាច់អាំង និងភោជនីដ្ឋានតូចមួយនៅជាប់គ្នា ក្នុងទីក្រុង Beirut ប្រទេសលីបង់ ដោយលោកបានជួញដល់ជនភៀសខ្លួនស៊ីរី ១៦នាក់ទៀតឲ្យធ្វើការងារ នៅហាងរបស់លោក។
Meet Abdul and Reem. They are Syrian Refugees living in Beirut, #Lebanon & need your help!
http://t.co/LFyCGjosMB pic.twitter.com/QCNXcCEtYJ
— #BuyPens (@Buy_Pens) August 27, 2015
ការផ្លាស់ប្ដូរជីវិតនេះ បានធ្វើឲ្យ al-Attar រួមនឹងកូនស្រី Reem មានសេចក្ដីត្រេកអរយ៉ាងខ្លាំង ហើយពួកគេសន្យាថា នឹងព្យាយាមជួយដល់ជនភៀសខ្លួនដទៃទៀត តាមលទ្ធភាពដែលអាចធ្វើទៅបាន។
គួរបញ្ជាក់ផងដែរថា al-Attar និងជនភៀសខ្លួនស៊ីរី ១៦នាក់នេះ ពិតជាមានសំណាងណាស់ ដែលទទួលបានការងារ និងពន្លឺនៃជីវិតថ្មី ខណៈដែលជនភៀសខ្លួនស៊ីរី ១,២លាននាក់ផ្សេងទៀត គ្មានការងារធ្វើ និងទីលំនៅច្បាស់លាស់ ហើយមូលហេតុទាំងនេះ គឺបណ្ដាលមកពីសង្គ្រាមស៊ីវិល ដែលកើតមាននៅក្នុងប្រទេសស៊ីរី អស់រយៈពេល៤ឆ្នាំមកហើយ៕