(តូក្យូ)៖ ក្រសួងការបរទេសជប៉ុន បានឲ្យដឹងនៅថ្ងៃសុក្រ ទី០៤ ខែធ្នូនេះថា រដ្ឋាភិបាលជប៉ុននឹងបង្កើតភ្នាក់ងារស៊ើបការណ៍សម្ងាត់ថ្មីមួយទៀត ដែលផ្ដោតសំខាន់ទៅលើក្រុម ISIS នេះបើយោងតាមការចេញផ្សាយរបស់កាសែត Jerusalem Post។
ភ្នាក់ងារស៊ើបការណ៍សម្ងាត់ថ្មីនេះ នឹងត្រូវចូលរួមប្រតិបត្តិការជាមួយក្រសួងការបរទេស ក្រសួងការពារជាតិ និងស្ថាប័នប៉ូលិស ជាពិសេសគឺមានទំនាក់ទងជាមួយនឹងស្ថានទូតជប៉ុនទាំងអស់នៅក្រៅប្រទេស។
មន្ត្រីជាន់ខ្ពស់របស់រដ្ឋាភិបាលជប៉ុនបានឲ្យដឹងថា ភ្នាក់ងារស៊ើបការណ៍សម្ងាត់ថ្មីនេះ ត្រូវបានបង្កើតឡើងក្រោយពេលដែលក្រុម ISIS វាយប្រហារកណ្ដាលទីក្រុងប៉ារីសបណ្ដាលឲ្យមនុស្ស
១៣០នាក់ស្លាប់ និងរបួសជាច្រើននាក់។
គួរបញ្ជាក់ផងដែរថា ជប៉ុននឹងធ្វើជាម្ចាស់ផ្ទះនៃកិច្ចប្រជុំ G7 នៅឆ្នាំ២០១៦ និងព្រឹត្តិការណ៍ Rugby World Cup នៅឆ្នាំ២០១៩ និងព្រឹត្តិការណ៍ Olympics ឆ្នាំ២០២០៕
