(បាងកក)៖ ប៉ូលិសថៃ បានបញ្ជាក់ និងអះអាងថា ពិតជាទទួលបានឯកសារសម្ងាត់មួយពីរដ្ឋាភិបាលរុស្ស៊ី ពាក់ព័ន្ធនឹងវត្តមានក្រុម ISIS នៅលើទឹកដីថៃ ដែលវត្តមាននេះគឺជាការគំរាមកំហែងថ្មីមួយសម្រាប់ប្រទេសថៃ នេះបើយោងតាមការចេញផ្សាយរបស់សារព័ត៌មាន Channel News Asia ចេញផ្សាយនៅរសៀលថ្ងៃទី០៤ ខែធ្នូ។
«ខ្ញុំអាចបញ្ជាក់បានថា សំបុត្រដែលបែកធ្លាយនោះគឺជាការពាតិ»។ នេះជាសំដីរបស់លោកវរសេនី Krisana Pattanacharoen អ្នកនាំពាក្យរបស់ប៉ូលិសថៃ។
នៅមុននេះ បណ្ដាសារព័ត៌មានជាច្រើនបានចុះផ្សាយថា ពលរដ្ឋស៊ីរីប្រមាណជា ១០នាក់ ដែលត្រូវបានគេជឿជាក់ថាជាបណ្ដាញរបស់ក្រុមឧទ្ទាម ISIS បានចូលទៅដល់ប្រទេសថៃតាំងពីខែតុលា ដោយគោលបំណង សំដៅវាយប្រហារទីតាំង និងកន្លែងផ្សេងៗដែលជាកម្មសិទ្ធិរបស់ប្រទេសរុស្ស៊ីនៅក្នុងប្រទេសថៃ។
រុស្ស៊ីបានសង្កត់ធ្ងន់នៅក្នុងឯកសារសម្ងាត់នោះថា ជនជាតិស៊ីរីប្រមាណ ១០នាក់បានចូលទៅកាន់ប្រទេសថៃនៅចន្លោះថ្ងៃទី១៥-៣១ខែតុលា ដោយមានជនសង្ស័យ ៤នាក់បសនធ្វើដំណើរទៅកាន់តំបន់សមុទ្រ Pattaya, មាន២នាក់ទៀតបានធ្វើដំណើរទៅកាន់កោះ Phuket, ២នាក់ទៀតទៅកាន់ទីក្រុងបាងកក ចំណែកជនសង្ស័យពីរនាក់ផ្សេងទៀតមិនដឹងទិសដៅច្បាស់។
គួរបញ្ជាក់ផងដែរថា រុស្ស៊ីបានចាប់ផ្ដើមបើកការវាយប្រហារកម្ទេចក្រុម ISIS នៅក្នុងប្រទេសស៊ីរី កាលពីថ្ងៃទី៣០ ខែកញ្ញា៕
