(អាស៊ែបៃហ្សង់)៖ ខណៈកំពុងធ្វើដំណើរទស្សនកិច្ច នៅក្នុងប្រទេសអាស៊ែបៃហ្សង់ នាយករដ្ឋមន្ត្រីតួកគី លោក Ahmet Davutoglu នៅថ្ងៃសុក្រនេះ បានជំរុញឲ្យរុស្ស៊ី កាត់បន្ថយនូវភាពតានតឹង រវាងតួកគីនិងរុស្ស៊ី ដែលបាននឹងកំពុងកើនឡើង បណ្តាលមកពីការបាញ់ទម្លាក់យន្តហោះចម្បាំងរបស់រុស្ស៊ី កាលពីពេលថ្មីៗកន្លងទៅនេះ ដោយកងទ័ពអាកាសតួកគី នេះបើតាមទីភ្នាក់ងារសារព័ត៌មានស៊ិនហួ ចេញផ្សាយនៅយប់ថ្ងៃទី០៤ ខែធ្នូ ឆ្នាំ២០១៥។
លោក Davutoglu បន្តថា តួកគីតែងតែផ្សារភ្ជាប់ទំនាក់ទំនងយ៉ាងល្អជាមួយរុស្ស៊ី ហើយបាននឹងកំពុងជំរុញឲ្យ លោកប្រធានាធិបតីរុស្ស៊ី Vladimir Putin ដោះស្រាយឡើងវិញនូវបញ្ហាជម្លោះ ពាក់ព័ន្ធនឹងការបាញ់ទម្លាក់យន្តហោះ តាមរយៈមធ្យោបាយការទូត។ លោកបន្តទៀតថា តួកគីមិនដែលមានបំណង ក្នុងការបង្កើនស្ថានភាពតានតឹងនោះទេ ពាក់ព័ន្ធនឹងការបាញ់ទម្លាក់យន្តហោះរុស្ស៊ី ហើយក៏មិនសុំអភ័យទោស ចំពោះរុស្ស៊ីពាក់ព័ន្ធនឹងការបាញ់ទម្លាក់នេះដែរ។
លោកនាយករដ្ឋមន្ត្រីរូបនេះ បានបញ្ជាក់ទៀតថា «ទណ្ឌកម្មរបស់រុស្ស៊ី ប្រឆាំងនឹងតួកគី មិនបានធ្វើឲ្យប្រទេសរបស់យើងធ្លាក់ចុះនោះទេ...រដ្ឋាភិបាលទីក្រុងម៉ូស្គូ គឺគួរតែបើកផ្លូវការទូត ដើម្បីដោះស្រាយឡើងវិញ លើវិបត្តិនេះ ជំនួសលើការដាក់ទណ្ឌកម្មប្រឆាំងនឹងតួកគី»៕