(លីប៊ី)៖ ក្រុមឧទ្ទាមរដ្ឋឥស្លាម កំពុងហ្វឹកហាត់ធ្វើជាអ្នកបើកបរយន្តហោះនៅមូលដ្ឋានទ័ពអាកាសក្នុងប្រទេស លីប៊ី ដោយប្រើប្រាស់យន្តហោះខ្នាតតូច ដែលនៅសេសសល់ពីរបបលោក Qaddafi ហើយអ្នកជំនាញបានបង្ហាញក្តីបារម្ភថា ក្នុងនោះយន្តហោះយ៉ាងហោចណាស់មួយគ្រឿង ដែលពួកគេអាចប្រើប្រាស់ សម្រាប់ធ្វើការវាយប្រហារតាមដែនអាកាសនៅអឺរ៉ុប នេះបើយោងតាមការលើកឡើងរបស់អ្នកវិភាគក្នុងតំបន់ដកស្រង់ដោយសារព័ត៌មាន Fox News ចេញផ្សាយនៅថ្ងៃទី០៥ ខែធ្នូ ឆ្នាំ២០១៥នេះ។
អ្នកជំនាញផ្នែកកិច្ចការនៅអាហ្វ្រិកខាងជើងលោក Col.Jacques Neriah បានលើកឡើងថា«យើងដឹងថា ក្រុមឧទ្ទាមជីហាត ព្យាយាមគ្រប់មធ្យោបាយដើម្បីវាយប្រហារលោកខាងលិច ហើយប្រសិនបើគេអាចបំផ្ទុះ ធ្វើអត្តឃាតខ្លួនឯងក្នុងរថយន្ត ជាការពិតពួកគេក៏អាចធ្វើសកម្មភាព ដោយប្រើប្រាស់យន្តហោះ ដូចគ្នា នេះមិនមែនជារឿងចម្លែកពេកនោះទេ។ នេះជាមធ្យោបាយមួយដែលនៅក្នុងគំនិតរបស់ពួកគេ គេធ្វើគ្រប់យ៉ាង ក្នុងគោលដៅបង្កការវាយប្រហារយ៉ាងសាហាវបំផុតតាមដែលអាចធ្វើទៅបាន»៕
