(វ៉ាស៊ីនតោន)៖ ប្រធានាធិបតីសហរដ្ឋអាមេរិកលោក បារ៉ាក់ អូបាម៉ា បានប្ដេជ្ញាថានឹង «កម្ទេច» ក្រុម ISIS ដោយបានលើកឡើងថា ពួកនេះគឺជាអ្នកប្រព្រឹត្តបទឧក្រិដ្ឋ និងជាឃាតករដ៏សាហាវ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី០៧ ខែធ្នូ។
«ការគំរាមកំហែងពីអំពើភេរវកម្មគឺជាការពិតប្រាកដ ប៉ុន្តែយើងនឹងអាចយកឈ្នះលើវា»។ នេះជាសំដីរបស់លោក អូបាម៉ា ដែលបានថ្លែងតាមរយៈកញ្ចក់ទូរទស្សន៍ដ៏កម្រមួយ ដែលមានការផ្សាយផ្ទាល់ចេញពីសេតវិមានតែ៣ប៉ុស្ដិ៍ប៉ុណ្ណោះ។
អ្វីដែលធ្វើឲ្យពលរដ្ឋអាមេរិកភ្ញាក់ផ្អើលនោះគឺលោកប្រធានាធិបតីបានអះអាងថា៖ «យើងនឹងកម្ទេចក្រុម ISIL និងក្រុមឧទ្ទាមផ្សេងទៀតដែលព្យាយាមធ្វើបាបយើង»។ សំដីនេះគឺសបញ្ជាក់ថា អាមេរិកនឹងមានចំណាត់ការឆាប់ៗក្នុងការកម្ទេចក្រុម ISIS។
គួរបញ្ជាក់ផងដែរថា ប៉ុន្មានថ្ងៃមុននេះ ខ្មាន់កាំភ្លើងពីរនាក់ប្ដីប្រពន្ធ បានបើកការវាយប្រហារទៅលើមជ្ឈមណ្ឌលផ្ដល់សេវាកម្មសាធារណៈមួយកន្លែងក្នុងរដ្ឋកាលីហ្វូញ៉ា ដែលបណ្ដាលឲ្យមនុស្ស១៤នាក់ស្លាប់ និង២១នាក់រងរបួស ហើយក្រោយមក ក្រុម ISIS បានអះអាងថា ខ្មាន់កាំភ្លើងពីរនាក់នោះគឺជាអ្នកគាំទ្រក្រុម ISIS ហើយអនុវត្តតាមបញ្ជា៕