(អាល្លឺម៉ង់)៖ យន្តហោះដឹកអ្នកដំណើរមួយគ្រឿង មានទិសដៅ ពីទីក្រុង Berlin ទៅកាន់ទីក្រុង Hurghada ប្រទេស អេហ្ស៊ីប បានចុះចត នៅអាកាសយាន្តដ្ឋាន Budapest នាថ្ងៃចន្ទនេះ បន្ទាប់ពីមានការគំរាមបំផ្ទុះគ្រាប់បែក នេះបើយោងតាមសេចក្តីរាយការណ៍ របស់ភ្នាក់ងារសារព័ត៌មាន Reuters ចេញផ្សាយនៅថ្ងៃទី០៧ ខែធ្នូ ឆ្នាំ២០១៥នេះ។
ស្ត្រីជាអ្នកនាំពាក្យប៉ូលិសម្នាក់ បានឲ្យដឹងថា ការគំរាមបំផ្ទុះគ្រាប់បែកនេះ មានគោលដៅវាយប្រហារ ទៅលើយន្តហោះ របស់ក្រុមហ៊ុនអាកាសចរណ៍មួយ ប៉ុន្តែបដិសេធមិនបញ្ជាក់ឈ្មោះ ក្រុមហ៊ុននោះទេ។ លោកស្រី បានឲ្យដឹងថា ប៉ូលិស បានធ្វើការត្រួតពិនិត្យទៅលើអ្នកដំណើរ ក៏ដូចជាកញ្ចប់ឥវ៉ាន់ នៅលើយន្តហោះ ដែលរងការគំរាមកំហែងនេះ។ យ៉ាងនេះក្តីសារព័ត៌មាន Reuters បានចេញផ្សាយសារជាថ្មីថា មិនមានគ្រឿងផ្ទុះណាមួយ ត្រូវបានគេរកឃើញ នៅលើយន្តហោះ ដឹកអ្នកដំណើរមួយនេះនោះទេ៕
