(អ៊ីរ៉ាក់)៖ នាយករដ្ឋមន្ត្រីអ៊ីរ៉ាក់លោក Haider al-Abadi បានលើកឡើងថា ក្រុម ISIS និងក្រុមឧទ្ទាមផ្សេងទៀត បានរត់ពន្ធប្រេងខុសច្បាប់តាមរយៈប្រទេសតួកគី ហើយលោកជឿថាការរត់ពន្ធនេះគឺមានការបើកដៃពីរដ្ឋាភិបាលតួកគីទើបអាចធ្វើទៅបាន នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី០៨ ខែធ្នូ។
នៅក្នុងជំនួបជាមួយរដ្ឋមន្ត្រីការបរទេសអាល្លឺម៉ង់លោក Frank-Walter Steinmeier, លោកនាយករដ្ឋមន្ត្រីអ៊ីរ៉ាក់បានបញ្ជាក់យ៉ាងសង្កត់ធ្ងន់ថា បើចង់កម្ទេចក្រុម ISIS ឬក្រុមឧទ្ទាមគឺត្រូវកាត់ផ្ដាច់ប្រព័ន្ធហិរញ្ញវត្ថុជាមុនសិន ក្នុងនោះគឺត្រូវបញ្ឈប់ការរត់ប្រេង ដែលជាប្រភពចំណូលធំ ហើយលោកក៏បានអំពាវនាវឲ្យបណ្ដាប្រទេសអន្តរជាតិជួយអ៊ីរ៉ាក់ក្នុងការប្រយុទ្ធប្រឆាំងនឹងក្រុម ISIS ផងដែរ។
គួរបញ្ជាក់ផងដែរថា នៅពេលនេះតួកគីមិនបានបញ្ជូនទ័ពបន្ថែមទៅកាន់តំបន់ Mosul ឡើយ បន្ទាប់ពីមានការព្រមានយ៉ាងខ្លាំងៗ ពីសំណាក់អ៊ីរ៉ាក់ ប៉ុន្តែតួកគីនៅមិនទាន់ដកទ័ពចេញឡើយ ខណៈដែលអ៊ីរ៉ាក់ បានប្រកាសថានឹងមានចំណាត់ការតាមផ្លូវច្បាប់៕
