(ឥណ្ឌា)៖ យ៉ាងហោចណាស់មានមនុស្ស៣នាក់បានស្លាប់ និង១០០នាក់ផ្សេងទៀតរបួសនៅក្នុងគ្រោះឧប្បទ្ទវហេតុរថភ្លើង២គ្រឿងបុកគ្នានៅភាគខាងជើងប្រទេសឥណ្ឌា នេះបើយោងតាមការចេញផ្សាយរបស់សារព័ត៌មាន RT ចេញផ្សាយនៅរសៀលថ្ងៃទី០៨ ខែវិច្ឆិកា។
ប៉ូលិសប្រចាំតំបន់បានបង្ហាញរបាយការណ៍បឋមថា ហេតុការណ៍នេះបានកើតឡើងនៅវេលាម៉ោងប្រមាណ ៨៖២៥នាទីព្រឹកថ្ងៃអង្គារនេះ បណ្ដាលឲ្យអ្នកបើកបររថភ្លើងម្នាក់ត្រូវបានស្លាប់ និងម្នាក់ទៀតរងរបួសធ្ងន់ ខណៈដែលមនុស្សជាច្រើនប្រមាណ ១០០នាក់ត្រូវបានបញ្ជូនទៅកាន់មន្ទីរពេទ្យ។ករណីរថភ្លើងពីរគ្រឿងបុកគ្នានេះ ត្រូវបានគេជឿជាក់ថាបណ្ដាលមកពីអ័ព្ទក្រាស់ ជាហេតុធ្វើឲ្យអ្នកបើកបររថភ្លើង មើលមិនឃើញ។
គួរបញ្ជាក់ផងដែរថា ឥណ្ឌាជាប្រទេសមួយដែលមានប្រព័ន្ធផ្លូវរថភ្លើងច្រើនជាងគេ ដែលបច្ចុប្បន្នមានជើងធ្វើដំណើរទៅមកប្រមាណ ១២.០០០ជើង, អ្នកដំណើរ ២៣លាននាក់ក្នុងមួយថ្ងៃ៕