(រុស្ស៊ី)៖ មនុស្ស៥នាក់ បានទទួលរងរបួសស្រាល បន្ទាប់ពីគ្រាប់បែកឆ្នៃមួយបានផ្ទុះឡើង នៅចំណតរថយន្តក្រុង កណ្តាលរដ្ឋធានីម៉ូស្គូ ប្រទេសរុស្ស៊ី នេះបើតាមព័ត៌មាន AFP ចេញផ្សាយនៅល្ងាចថ្ងៃទី០៨ ខែធ្នូ ឆ្នាំ២០១៥នេះ។
ហេតុការណ៍ផ្ទុះនេះ បានកើតឡើងនៅយប់ថ្ងៃចន្ទ (ម៉ោងក្នុងតំបន់) តាមបណ្តោយផ្លូវ Pokrovka ជាតំបន់ដ៏ពេញនិយម កណ្តាលទីក្រុងម៉ូស្គូ ជាចំណុចសម្បូរទៅដោយ បារ និងភោជនីយដ្ឋានជាច្រើន។
អ្នកនាំពាក្យប៉ូលិសម៉ូស្គូ លោក Maxim Kolosvetov បានឲ្យដឹងថា «ការស៊ើបអង្កេតពាក់ព័ន្ធនឹងករណីហិង្សាមួយនេះ បាននិងកំពុងធ្វើឡើង»។ តាមព័ត៌មានបឋមបានឲ្យដឹងថា គ្រាប់បែកឆ្នៃនេះ ត្រូវបានគប់ចេញពីរថយន្តមួយគ្រឿង ឬក៏អគារនៅជិតកន្លែងកើតហេតុ ដែលបានបណ្តាលឲ្យ មនុស្ស៥នាក់ទទួលរងរបួស។ បន្ទាប់ពីមានហេតុការណ៍នេះកើតឡើង រថយន្តប៉ូលិស, រថយន្តពន្លត់អគ្គីភ័យ និងរថយន្តសង្គ្រោះបន្ទាន់ បានទៅដល់កន្លែងកើតហេតុ ដើម្បីគ្រប់គ្រងស្ថានការ។
ស្ត្រីម្នាក់ឈ្មោះ Ksenia អាយុ២៨ឆ្នាំ សាក្សីឃើញផ្ទាល់ភ្នែកបានឲ្យដឹងថា «ខ្ញុំបាននៅចំណតរថយន្តក្រុង ហើយភ្លាមៗនោះខ្ញុំបានឮសំឡេងផ្ទុះយ៉ាងខ្លាំង ខ្ញុំភ័យជាខ្លាំង ដោយដំបូងខ្ញុំគិតថាមានការបាញ់ប្រហារ ហើយខ្ញុំក៏បានរត់ចេញឆ្ងាយ ពីចំណតរថយន្តក្រុងតែម្តង» ៕