(ប៉េកាំង)៖ រដ្ឋាភិបាលចិនបានធ្វើការរិះគន់ចំពោះទំនាក់ទំនង ការពារជាតិយ៉ាងជិតស្និទ្ធ របស់សហរដ្ឋអាម៉េរិក និងសឹង្ហបុរី ដែលរួមទាំងការដាក់ពង្រាយយន្តហោះយោធា ប្រភេទ US Navy P-8 Poseidon របស់សហរដ្ឋអាម៉េរិក ទៅកាន់ប្រទេសសឹង្ហបុរី ដែលស្ថិតនៅតំបន់ អាស៊ីអាគ្នេយ៍មួយនេះ នេះបើតាមព័ត៌មាន AP ចេញផ្សាយនៅយប់ថ្ងៃទី៨ ខែធ្នូ ឆ្នាំ២០១៥នេះ។
អ្នកនាំពាក្យក្រសួងការបរទេសចិន លោក Hua Chuying បានលើកឡើងថា «យោធាដ៏រឹងមាំរបស់សហរដ្ឋអាម៉េរិក នាពេលបច្ចុប្បន្ន មិនផ្តល់ភាពងាយស្រួល ចំពោះសាធារណៈជន និងផលប្រយោជន៍រយៈពេលយូរអង្វែងនោះទេ ក្នុងចំណោមបណ្តាប្រទេសនៅក្នុងតំបន់ យើងសង្ឃឹមថា ភាគីដែលពាក់ព័ន្ធ នឹងផ្តល់ភាពទុកចិត្តរវាងគ្នាទៅវិញទៅមក ក្នុងចំណោមបណ្តាប្រទេសក្នុងតំបន់»។
គួរជំរាបថា ការរិះគន់របស់រដ្ឋាភិបាលទីក្រុងប៉េកាំងនេះ បានធ្វើឡើង បន្ទាប់ពីមានការចុះហត្ថលេខា លើកិច្ចព្រមព្រៀងសហប្រតិបត្តិការការពារជាតិ រវាងរដ្ឋមន្ត្រីការពារជាតិ សហរដ្ឋអាម៉េរិក លោក Ash Carton និងរដ្ឋមន្ត្រីការពារជាតិសិង្ហបុរី លោក Ng Eng Hen ដែលបានធ្វើឡើងកាលពីថ្ងៃចន្ទ៕
