(អាមេរិក)៖ នៅក្នុងរបាយការណ៍ថ្មីមួយបានបង្ហាញថា ក្រុម ISIS បានកសាងឃ្លាំងអាវុធជាច្រើនកន្លែង ដោយអាវុធទាំងនោះភាគច្រើនផលិតឡើងនៅសហរដ្ឋអាមេរិក នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី០៩ ខែធ្នូ។
នៅក្នុងរបាយការណ៍របស់អង្គការលើកលែងទោសអន្តរជាតិ ដែលបានចេញផ្សាយនៅថ្ងៃចន្ទកន្លងទៅនេះ បានបញ្ជាក់ថា នៅក្នុងឃ្លាំងអាវុធរបស់ក្រុម ISIS ភាគច្រើនជាសព្វាវុធដែលផលិតឡើងនៅសហរដ្ឋអាមេរិក ដោយអាវុធទាំងនោះត្រូវបាន ISIS ប្លន់ពីក្រុមយោធាអ៊ីរ៉ាក់ និងក្រុមឧទ្ទាមស៊ីរី ដែលជាសម្ព័ន្ធមិត្តដ៏ជិតស្និទ្ធរបស់សហរដ្ឋអាមេរិក ហើយអាវុធទាំងនោះត្រូវបានគេជឿជាក់ថា ជាអាវុធដែលអាមេរិកផ្ដល់ជំនួយដល់ក្រុមក្រុមយោធាអ៊ីរ៉ាក់ និងក្រុមឧទ្ទាមស៊ីរី។
នៅក្នុងរបាយការណ៍ជាង ៤០ទំព័រ មិនបានចោទប្រកាន់អាមេរិកថា ជាអ្នកផ្គត់ផ្គង់អាវុធដល់ក្រុម ISIS នោះទេ ប៉ុន្តែវាជាការចូលរួមចំណែកដោយចៃដន្យមួយក្នុងការផ្ដល់អាវុធដល់ក្រុម ISIS។
អង្គការលើកលែងទោសអន្តរជាតិ បានត្រួតពិនិត្យទៅលើរូបភាព និងវីដេអូដែលយកមកពីប្រទេសអ៊ីរ៉ាក់ និងស៊ីរីជាច្រើនដង រហូតកំណត់បានថា ឃ្លាំងអាវុធជាច្រើនរបស់ក្រុម ISIS ត្រូវបានកសាងឡើងនៅក្នុងប្រទេសអ៊ីរ៉ាក់ និងស៊ីរី ដោយអាវុធទាំងនោះ ក្រុម ISIS បានវាយឆ្មក់ និងប្លន់យកពីកងកម្លាំងដែលទន់ខ្សោយ៕