(អាមេរិក)៖ សហស្ថាបនិក និងជានាយកប្រតិបត្តិបណ្ដាញសង្គម Facebook លោក Mark Zuckerberg បានបង្ហាញជំហក្នុងការគាំទ្រពេញទំហឹងលើកពលរដ្ឋម៉ូស្លីមនៅជុំវិញពិភពលោក ដោយការគាំទ្រនេះ ត្រូវបានលោក Zuckerberg បង្ហោះនៅលើ Page ផ្ទាល់ខ្លួន។
បន្ទាប់ពីមានការវាយប្រហារនៅទីក្រុងប៉ារីស លោក Mark Zuckerberg បាននឹកស្រមៃថា ពលរដ្ឋម៉ូស្លីមទទួលអារម្មណ៍ភ័យខ្លាច ដោយសារតែទង្វើរបស់អ្នកដទៃ។ «ក្នុងនាមខ្ញុំជាជនជាតិជីហ្វមួយរូប ឪពុកម្ដាយរបស់ខ្ញុំបានបង្រៀនខ្ញុំថា យើងត្រូវតែក្រោកឈរឡើងប្រឆាំងនឹងការវាយប្រហារគ្រប់រូបភាព បើទោះបីជាការវាយប្រហារនោះមិនមែនកើតនៅថ្ងៃនេះក្ដី ប៉ុន្តែយើងត្រូវតតាំងដើម្បីសេរីភាព»។ នេះជាសំដីរបស់លោក Mark Zuckerberg។
លោកបានបញ្ជាក់ទៀតថា ក្នុងនាមលោកជាមេធំ Facebook លោកចង់ឲ្យជនម៉ូស្លីមគ្រប់រូបដឹងថា Facebook តែងតែទទួលស្វាគមន៍ជនម៉ូស្លីមជានិច្ច ហើយលោកនឹងប្រយុទ្ធប្រឆាំងដើម្បីការពារសិទ្ធិបុគ្គលិក សន្ដិភាព និងសុវត្ថិភាពដល់ជនម៉ូស្លីម។
ជាចុងក្រោយលោក Mark Zuckerberg បានបញ្ជាក់ថា មិនត្រូវអស់សង្ឃឹមឡើយត្រូវក្រោកឈរនិងកសាងពិភពលោកឲ្យល្អប្រសើរទាំងអស់គ្នា។
គួរបញ្ជាក់ផងដែរថា ជនម៉ូស្លីម មិនមែនជាក្រុមភេរវករ ឬក្រុមឧទ្ទាម ISIS នោះទេ ផ្ទុយទៅវិញជនម៉ូស្លីមភាគច្រើនតែងតែទទួលរងការភិតភ័យពីសំណាក់ក្រុមភេរវករ ដែលអះអាងថាខ្លួនជាជនជាតិម៉ូស្លីម៕
