(កាប៊ុល)៖ ចំនួនអ្នកស្លាប់ បានកើនឡើងដល់ ៥០នាក់ នៅក្នុងការវាយប្រហាររយៈពេលមួយថ្ងៃ ដោយក្រុមឧទ្ទាម Taliban ប្រឆាំងនឹងបណ្តុំអគាររស់នៅរបស់ប្រជាពលរដ្ឋ នៅជិតអាកាសយាន្តដ្ឋានមួយកន្លែង នាតំបន់ភាគខាងត្បូង ទីក្រុង Kandahar របស់អាហ្វហ្គានីស្ថាន ដោយបានបញ្ចប់ការវាយប្រហារ កាលពីយប់ថ្ងៃពុធ នេះបើតាមទិន្នន័យពីក្រសួងការពារជាតិអាហ្វហ្គានីស្ថាន ចេញផ្សាយដោយព័ត៌មាន Xinhua នៅរសៀលថ្ងៃទី១០ ខែធ្នូ ឆ្នាំ២០១៥នេះ។
«លទ្ធផលនៃការវាយប្រហាររបស់ក្រុមឧទ្ទាម នៅជិតអាកាសយាន្តដ្ឋាន បានសម្លាប់មនុស្សចំនួន៥០នាក់ ក្នុងនោះ ៣៨នាក់ជាជនស៊ីវិល និង១០នាក់ទៀតជាកងទាហាន ព្រមទាំង២នាក់ផ្សេងទៀត ជាមន្ត្រីប៉ូលិស» នេះបើតាមរបាយការណ៍ ពីក្រសួងការពារជាតិ។ ក្នុងនោះ កងទាហាន១៧នាក់, ប៉ូលិស៤នាក់ និងជនស៊ីវិល ១៤នាក់ បានទទួលរងរបួសផងដែរ នៅក្នុងការវាយប្រហារនេះ។
តាមរបាយការណ៍បានបញ្ជាក់ថា ជនសង្ស័យជាក្រុមឧទ្ទាម Taliban ទាំង១១នាក់ ដែលពាក់ព័ន្ធនៅក្នុងការវាយប្រហារនេះ ត្រូវបានសម្លាប់ហើយ៕
