(បារាំង)៖ មេដឹកនាំវ័យក្មេងកូរ៉េខាងជើងលោក គឹម ជុនអ៊ុន បានប្រកាសសង្គ្រាមប្រឆាំងនឹងការកាប់បំផ្លាញ់ព្រៃឈើ នេះបើយោងតាមសំដីរដ្ឋមន្ត្រីការបរទេសកូរ៉េខាងជើងបានថ្លែងឲ្យដឹងនៅថ្ងៃចន្ទម្សិលមិញ
នេះនៅក្នុងកិច្ចប្រជុំពិភាក្សាស្ដីអំពីបញ្ហាអាកាសធាតុ ២០១៥ នៅក្នុងប្រទេសបារាំង នេះបើយោងតាមការចុះផ្សាយរបស់សារព័ត៌មាន Channel News Asia ចេញផ្សាយនៅថ្ងៃទី០៨ ខែធ្នូ។
«លោកគឹម ជុនអ៊ុន បានប្រកាសសង្គ្រាមលើការកាប់បំផ្លាញព្រៃឈើ និងការដាក់នូវគម្រោងការធំមួយដើម្បីប្រែក្លាយតំបន់ភ្នំទាំងអស់នៃប្រទេសកូរ៉េខាងជើង ឲ្យទៅជាភ្នំមាស ដោយមានដើមឈើធំៗ និងព្រៃក្រាស់»។ នេះជាសំដីរបស់លោក Ri Su Yong រដ្ឋមន្ត្រីការបរទេសកូរ៉េខាងជើងបានថ្លែងឲ្យដឹងនៅក្នុងកិច្ចប្រជុំ។
កូរ៉េខាងជើង ជាប្រទេសមួយស្ថិតក្នុងចំណោម ១៩៥ប្រទេស ដែលបានចូលរួមប្រជុំនៅក្នុងទីក្រុងប៉ារីស
ក្នុងគោលដៅស្វែងរកដំណោះស្រាយ និងទប់ស្កាត់ការបំភាយឧស្ម័នផ្ទះកញ្ចក់ ដែលជំរុញឲ្យមានការផ្លាស់ប្ដូរអាកាសធាតុ។
កូរ៉េខាងជើងមានគម្រោងផ្ដួចផ្ដើមដាំដើមឈើក្នុងទ្រុងទ្រាយធំនៅក្នុងរយៈពេល ១០ឆ្នាំខាងមុខ ដែលនោះជាកិច្ចខិតខំប្រឹងប្រែងថ្នាក់ជាតិដើម្បីកាត់បន្ថយការប្រែប្រួលអាកាសធាតុ និងការកាត់បន្ថយការបំភាយឧស្ម័នផ្ទះកញ្ចក់៕