(អូហៃយ៉ូ)៖ យន្តហោះខ្នាតតូចមួយបានធ្លាក់ទៅលើលំនៅដ្ឋានរបស់ប្រជាពលរដ្ឋ​ ខណៈ​ពេល​ហោះជិតដល់អាកាសយានដ្ឋាន Akron រដ្ឋ​អូហៃយ៉ូ សហរដ្ឋអាមេរិក ដែល​បណ្ដាល​ឲ្យមនុស្សនៅលើយន្តហោះស្លាប់​ ប៉ុន្តែមិនដឹងពីចំនួនច្បាស់លាស់​ នេះបើយោងតាមការ​ចុះផ្សាយរបស់ CNN ចេញផ្សាយនៅថ្ងៃទី១១ ខែវិច្ឆិកា។

«យើងមិនដឹងថា យន្តហោះនោះធ្លាក់នៅម៉ោងប៉ុន្មាន។ យើងក៏មិនដឹងថា មាន​មនុស្ស​ប៉ុន្មាននាក់ត្រូវបានស្លាប់ ហើយយើងក៏មិនបានដឹងថា មនុស្សនៅលើយន្តហោះនោះ ជា​អ្នកដំណើរ ឬមួយយ៉ាងណា និងមាន​ចំនួនប៉ុន្មានដែរ» ​នេះ​ជាសំដីរបស់លោក Bill Haymaker អាជ្ញាធររដ្ឋអូយៃយ៉ូ បានថ្លែងប្រាប់អ្នកសារព័ត៌មានក្រោយពេលធ្លាក់យន្តហោះ។

បើតាមប្រភពរាយការណ៍ផ្សេងទៀតបានឲ្យដឹងថា យន្តហោះនេះជារបស់ក្រុមហ៊ុន Hawker និងផ្ទុកមនុស្ស ១០នាក់ ដោយបានធ្លាក់នៅលើផ្ទះប្រជាពលរដ្ឋ និងបានផ្ទុះ​ឆេះ​តែម្ដង៕